دورمویا بیر آن

دالغا دایانار كن

داهی دالغا اولا بیلمز

«آلپار سولدوزلو»

دیرچه لمیش وارلیق

به نقل از نشریه ی نوید آذربایجان

دوقتور پرویز محمدی –  سولدوز

وارلیق قورویانلار ، كولتور وورغونلاری ، دیل عاشیقلری ، توپراق سئونلر ، اوره كلرینده اومود بئجه رنلر، یول بیرلیك له ، باغیمسیز بیر قزئت و درگی ساحه سینده چالیشماغی ان بؤیوك شرف و اوستون گؤره و سانیرلار . آغیر یوك چیگینلرینده دوغودان باتی یا یوخ ، باتی دان دوغویا ، ایشیق داشی ییرلار .
” نوید آذربایجان ” عنوان ایله تانینان ، زنگین بیر درگی ده چالیشان لار ، كولتور سئون خالقیمیزین دالغالی كؤنوللرینده یاشاماغا و آیدین لیق بسله ین اوره كلرده قوناق اولماغا گووه نیرلر . هر ایلگی بیر تئل ایله باغلانسا دا او تئلی ساخلاماق و ایپكدن توخونموش و اوزولمه ین ایلگی یه چئویرمك  گره كدیر .” نوید آذربایجان ” و خالق آراسیندا یارانان ایلگی ان اسكی ، داواملی و اوزولمه ین بیر ایلگی دیر.  ” نوید آذربایجان ” ایللر بویو یاییلیب ، كؤنوللرده چیچك له نیب گول آچیب و قالارغی سئوگی كیمی اوره كلرده یئر تاپیب . ایندی بوگون نئچه ایلدن سونرا یاییلماغا باشلاییر، بللی دیر تانری نین عنایتی ایله ، اوسانماز چالیشانلاری نین همتی ایله و خالقیمیزین یول بیرلیغی ایله اود یوردونون عطیرلی گوللری تكین چیچكله نیب ، گول آچاجاق ، گؤزللیك لری گؤزه چكیب و اومود یاراداجاق . اینجه سئوینج لری قارینج – قارینج اؤلكه میزده یاشادیب و اؤز صلابتی ایله” یاشایاجاق” . چونكی : ” یارادیب یاشادان ابدی یاشایاجاق ” .آیدین لیق سئون قلم ، گئجه نین توكه نمه سین ، قارانلیق باغریندان سحرین دوغولماسین ” نوید ” وئریر .
ایشیق یایان قلم ، اؤلكه نین قوراقین یئر اوزوندن اوزوب گؤیون یئددینجی قاتیندا قورور و ایشیق سئونلری گؤزل آ یلا ، پارلاق اولدوزلارلا ، گولر گونله و آیدین اولكه لرله  قونشو ائیله ییر .
دوزگون قلمین هارایینا و باغیرتی سینا شیمشك لر شاخیب و قاراقاباق بولودلار پارچالانیر .صلابتلی قلم قابارلی اللرله شرفه اویغون اولان ایستك لری بولودلارین تارلاسیندا اكیب و دالغالی گؤزلرینین جوشغون پینار ایله سوواریر و داملا – داملا گؤز یاشی ایله پاسلاندیریلمیش گوزگولردن قات – قات پاسلاری سیلیر و قیوریلیب – آچیلان كؤنول یارالارینا ملحم اولور . دوغو دا دوغولان گون كیمی هر گون مین لر قوجاق گونش داشی ییر و ایشیق سئون اینسانلارا ، گونش گؤزله ین گؤزلره ، آیدین لیق بكلین كؤنول لره اومود وئریر .كسگین قلم قیشین قارانلیق دوستاقیندا ایتگین یازی آراییر ، خزان وورموش خیال لاری شاختا دونداران رویا لاری ، پوزقون اومودلاری سولغون دیلك لری و دونداریلمیش دویغولاری چیچك لندیریر و وارلیق دنیزینده اوزوب ، دالغالارلا دالغالانیب ، كئچمیشین دیرلی اینجی لرین اوزه چیخاردیر و خالقلارین وارلیغین و شرفین قورویور و بونا گؤره :
تانری قرآن دا قلمه آند ایچیب
یازقی سینی هر نه دن اوستون بیلیب
سوسمایان قلم ، خالقی سسله ییر ، چاغیریر و اوجا سسله باغیریر :
اویانماق ، آیینماق گركدیر گره ك
درین بیر باخیش لا دونیایا باخین
آچیلیب ، جالانیب
گئچمیش یولوندا
وارلیغین بوقچاسی
آیدین گؤرونور
بوغولموش دویغولار
پوزقون آرزیلار
تاپدالانمیش ایستك لر
سولغون دیلك لر
توپراغین اوستونه
داغیلیب بوتون
تاریخ تارلاسیندا 
دیرچه لن ” وارلیق”
گؤزله ییر چالیشاق
گول آچسین بوگون
كؤنول سیغناقیندا
توپراق باغریندا
سارسیلماز و اوسانماز قلمین بیر دیله گی وار مین بیر جانی ، هر جانیندا مین بیر آماجی و او ده یرلی “‌دیلك ” یاشادماق دیر اود یوردونو قارینج – قارینج كؤنول لرده و قوروماقدیر قاباریق وارلیغینی ، اولای لار اوزرینده . بئله بیر قلم قارانلیقدان كؤچوب ، ایشیق لیغا چاتماغی گرچك لرین آغیر یوكون داشاییب ، حقیقت یولونا ایز سالماغی اؤزل گؤره و بیلیب و گؤزل آماج سانیر و كؤنلوموزون ساحه سینده یابانجی دویغولارین آت چاپمالارینی و دوغال ایستك لر و دویغولاریمیزین یابانجی آیاقلارین آلتیندا ازیلمه سینی چكه نمیر و اؤزگورلوك زیروه سینه چاتماق اوچون اوجالیق سئون قارتال كیمی قانادلانیر ، قاناد چالیر و اوجالاردا اوچماغی تجروبه ائدیر و گؤیون یئددی نجی قاتیندان اوجا سسله سسله نیر :
گرچك عاشیق لری ! حاق وورغونلاری !
حقیقت قویمایین ترسینه دؤنسون
گرچك گره ك اولدوز سایاق پارلاسین
نور ساچان اولدوزو  قویمایین سؤنسون
سوسموش قلم بو اوجا هارایی ائشیدیر ، اوره گی چیرپینیر ، بارماق لارلا هاماش اولور گؤز یاشی تؤكور كاغاذلا سس سسه وئریب پیچیلداشیرلار. پاییز قوشلاری كیمی سطیرلرین بوداقلاریندان او بیری بوداقلارا قونور عاشیق لارین باغریندا كی ساز كیمی سیزلاییر و گرچك وورغونلارینا قاریشیر و بئله سسله نیر :
قلم ندیر؟ یازماق اوچون
ظولمات كؤكون قازماق اوچون
گؤز اونونده حاق سؤزلری
قاطار – قاطار دوزماق اوچون
***
یونولماییب آزماق اوچون
خوش ایلقاری پوزماق اوچون
ناحاقلیغین آجیلیغین
اوره كلره سیزماق اوچون
بئله لیك له بوتون قلملر آغیر گؤره ولرین دویورلار و گرچك لری گؤزه چكیرلر . مینلر ایلقیم كی اؤزلرین دنیز شكلینده گؤستریردیلر ایتیرلر و دوز یول لار گؤزوموزون اؤنونده بیتیرلر .
( توپراق ) آغیر اویخودان اویانیر ، نفس چكیر ، هوسله نیر و چیچك له نیر. یارالی قارتال لار اوخلانمیش قاناد ایله اونودولموش اوچوش لارین یادا سالیب ، قانادلانیب و قاناد چالیرلار. زیروه بزه نیب ، آماج باغرین آچیب ؛ صلابتلی اوچقان قارتاللارین یارالارینا ملحم قویوب اونلاری باغرینا باسا .
ایندی گونش سایاق، ایشیق ساچان ، آنلاییش یایان و اینام پایلایان ” نوید آذربایجان ” سای سیز سئوینج له یاییلماقا باشلاییر و بیز گلجه یه گؤز تیكمیشیك كی :
گؤزلردن آخان یاش اولاجاق می  سئل ؟
سولونموش دویغولار آچاجاق می  گول ؟
ویجدانین قولاغی ائشیدمز اولسا
تاپدانمیش ایستك لر آچاجاق می  دیل ؟
***
باغیمسیزوارلیغی
بوتؤو كیملیكی
ده یرلی تاریخی
اؤزل كولتورو
قاباریق كئچمیشی
گؤزل توپراغی
بیر خالقین آماجین
اوستون بیر دیلین
اونودماق ، اونودماق
اونودماق اولماز
هیجران پرده سینده آسیمیلاسیون ماهنی سین چالانلار گؤز تیكیبلر بیر بؤیوك خالق وارلیغین دان ، كیملیگیندن ، تاریخیندن ، كولتوروندن و ان گوجلو و اوستون دیلیندن و بوتون ایستك لریندن ال چكیب آیریلسین و گئتدیكجه اوزاقلاشسین . داها بیلمیرلر كی وارلیق قورویانلار گونشین قاپیسین خالقین اوزونه آچیب لار و دامارلاریندا دولانان قان وارلیغین جوشغون پیناریندان جوشور و قانادلاریندا اوچوش جسارتی گون به گون آرتیر و بیلیب لر سئوگی لره گؤز یومماق اولماز . ایندی كؤنول ائوینه پارلاق اولدوزلاری قوناق ائدیب ، قارا قاباق بولودلارین و بوتون قارانلیقلارین قوپاراغین گؤتوروب سورگون سالماق ، ظولماتین كدرلی اوره گین اوزوب و باغرین دئشمك و چیسگین دومانلیغین كؤكسون سؤكمك و سئوگی نین گور اوجاغین گورله ندیرمك ، زنگین آخان و شاققیلدایان شلاله لرین و اوجا هارایلی وولكانلارین و یام – یاشیل یازین گؤزللیك لرین گؤزه چكمك ، كسرلی قلملرین گؤره ویدیر .
اوزاق دوشن اولدوزلارین
قاش – گؤز آتان یالقیز گونون
آیین – شایین اویموش آیین
اولكر آدلی یئددی یارین
كؤینك سیخان بولودلارین
ووقارلی قوتسال یوللارین
شانلی توپراق آل بایراقین
قارلی – قارلی اوجا داغین
گیزلی – گیزلی گیزلرینی
باسدیریلمیش ایزلرینی
آچیق – آچیق آچیقلاماق
یازارلارین گؤره ویدیر

یازان : دوقتور پرویز محمدی - سولدوز

http://orman.arzublog.com